விஜய் படத்திற்கு இசையமைக்க காரணம் தனுஷ் - அனிருத்!

கொலவெறி பாடலின் மூலம் தமிழ்த்திரையுலகிற்கு அறிமுகமானவர் இசையமைப்பாளர் அனிருத். முதல் படத்திலேயே, அதுவும் முதல் பாடலிலேயே இந்திய ரசிகர்கள் அனைவரின் பார்வையையும் தன் மீது திருப்பிய அனிருத்துக்கு பாராட்டுகள் குவிந்தாலும், வாய்ப்புகள் குவியவில்லை. 3 திரைப்படத்தைத் தொடர்ந்து அனிருத் இசையமைத்த எதிர்நீச்சல் திரைப்படத்திலும் அனைத்துப் பாடல்களும் ஹிட் தான்.

ஆனால் இந்த ஹிட் 3 திரைப்படத்தைப்போல அனிருத்தை ஏமாற்றவில்லையாம். இன்று(13.05.13) நடந்த எதிர்நீச்சல் சக்சஸ் மீட்டில் பேசிய அனிருத் “ஏ.ஆர். முருகதாஸ் புரொடக்ஷனில் உருவாகவிருக்கும் திரைப்படம், ஏ.ஆர்.முருகதாஸ் இயக்கத்தில் விஜய் நடிக்கவிருக்கும் திரைப்படம், தனுஷ் தயாரிப்பில் எதிர்நீச்சல் படக்குழு அப்படியே இணையும் மற்றொரு படம் என 3 படங்கள் தற்போது கைவசம் இருக்கின்றன.

கொலவெறி பாடல் எனக்கு பெயர் வாங்கிக்கொடுத்தாலும், எதிர்நீச்சல் திரைப்படத்தில் எனக்கு கிடைத்த வெற்றி தான் எனக்கு வாய்ப்புகளை உருவாக்கிக் கொடுத்துள்ளது. எதிர்நீச்சல் தான் எனக்கு முதல்படம். எனக்கு இந்த வய்ப்பை ஏற்படுத்திக் கொடுத்த தனுஷுக்கு மிக்க நன்றி” என்று கூறியுள்ளார். முருகதாஸ் இயக்கத்தில் விஜய் நடிக்கவிருக்கும் திரைப்படத்தைத்தான் அனிருத் மிகவும் எதிர்பார்த்துக் கொண்டிருக்கிறாராம்.